Seminar dhe Miqësi Mes Pastorëve të Konferencës Vjetore
Pastorët dhe predikuesit laikë të Kishës së Bashkuar Metodiste në Shqipëri morën pjesë në një seminar frymëzues tre-ditor së bashku me kolegët e tyre nga Serbia dhe Maqedonia e Veriut. Të tri shtetet janë pjesë e një Konference të përbashkët Vjetore, që shërben si një familje shpirtërore ku ndahen përvoja, sfida dhe bekime.
Këtë vit, seminari u mbajt në Shkup, nën mikpritjen e ngrohtë të Distriktit të Maqedonisë. Tema kryesore ishte forcimi i marrëdhënieve ndërnjerëzore, bashkëpunimit ndërkishtar dhe lidhjeve në nivel distrikti.
Takimin e udhëhoqi Peshkopi Stefan Zürcher, i cili frymëzoi pjesëmarrësit me fjalë mbi unitetin, dashurinë dhe thirrjen e përbashkët për t’i shërbyer Krishtit.
Të ftuar të veçantë ishin pastori John Calhun nga Kisha Metodiste anglisht-folëse e Vjenës dhe pastori hungarez Bence Vigh.
Në sesionet e grupit, pastorët ndanë historitë personale të thirrjes së tyre në shërbesë – mënyrën se si Zoti i udhëhoqi drejt derës së kishës – dhe diskutuan tema të rëndësishme si djegia shpirtërore (burnout) dhe sfidat e punës pastorale.
Këto ditë ishin një kohë e bekuar bashkësie, lutjeje dhe frymëzimi. Megjithë dallimet gjuhësore, dashuria e Krishtit bashkoi zemrat dhe forcoi lidhjet mes pastorëve të rajonit.
Takimi përfundoi me falënderime dhe lutje, duke u lënë të gjithëve dëshirën për t’u ribashkuar përsëri.
Takimi i radhës do të mbahet në Serbi, gjatë pranverës së ardhshme në Konferencën Vjetore të radhës.
