11 vite besim, përkushtim dhe jetë të përbashkët në Elbasan
Njëmbëdhjetë vite më parë, një bashkësi e vogël besimtarësh hodhi themelet e asaj që sot është një familje e gjallë e besimit në qytetin e Elbasanit.
Me mirënjohje ndaj Perëndisë dhe gëzim për rrugëtimin e përbashkët, Kisha e Bashkuar Metodiste në Elbasan festoi përvjetorin e saj të njëmbëdhjetë.
Historia e kësaj bashkësie nisi më 26 tetor 2014, me vetëm tri familje që kishin lidhje të mëparshme me jetën e besimit në Bishnicë, në malësinë e Mokrës. Ishte një fillim modest, por i mbështetur në besim, përkushtim dhe dëshirën për të ndërtuar një komunitet ku njerëzit të mund të njihnin Perëndinë dhe të gjenin vendin e tyre.
Sot, njëmbëdhjetë vite më vonë, kjo kishë numëron dhjetëra pjesëmarrës besnikë. Rritja e saj nuk ka ardhur përmes gjesteve të mëdha, por përmes diçkaje shumë më të thjeshtë dhe të çmuar: marrëdhënieve njerëzore, miqësisë, dëshmisë së besimit dhe dishepullimit në jetën e përditshme.
Besimtarët kanë ftuar familjarët, miqtë dhe fqinjët e tyre për të qenë pjesë e bashkësisë. Shumë prej atyre që dikur erdhën si vizitorë, sot janë pjesë e pandashme e jetës së kishës. Ata nuk janë më thjesht të ftuar, por njerëz që e ndiejnë këtë bashkësi si shtëpinë e tyre shpirtërore.
Përvjetori ishte një rast për të kujtuar fillimet, për të falënderuar Perëndinë për gjithçka të përjetuar gjatë këtyre viteve dhe për të parë me shpresë drejt së ardhmes.
Fotografitë e festës mund të përcjellin buzëqeshjet, gëzimin dhe harmoninë e kësaj bashkësie. Megjithatë, ajo që e bën vërtet të veçantë Kishën e Elbasanit është e vështirë të përshkruhet vetëm me fjalë apo pamje. Ngrohtësia e marrëdhënieve, mikpritja dhe ndjenja e përkatësisë kuptohen më së miri kur bëhesh pjesë e një shërbese apo feste të tyre.
I jemi mirënjohës Perëndisë për të gjithë ata që kanë shërbyer dhe vazhdojnë të shërbejnë me përkushtim në këtë bashkësi.
Urojmë që Perëndia të vazhdojë të udhëheqë Kishën e Elbasanit, të forcojë besimin e saj dhe ta bëjë gjithnjë e më shumë një vend ku dashuria e Krishtit përjetohet dhe ndahet me të tjerët.